Raja na Burju dohot Ama ni Holit Mangging
Illustrasi ini berhubungan dengan Amani Holit Mangging (yang rakus)
Mangihuthon turi-turian, di nagori Batarasiang adong do sahalak raja naburju jala parlambas roha. Malo jala mura mengkel suping. Ganteng jala namora jong. Tanona do sude luat Batarasiang. Puhut jala gogo mangula arian borngin. Las do rohani sude jolma mida raja on. Dua ma niolini raja on. Sangaja do dioli raja i dua, ai sada tohonan do i di ibana – asa pas dua- ima ra nanidokni tohonan i. Alai na sabulan naung salpu matema sada niolina i. Humasilsal ma sude soridaluni harajaon i mangalului sada nari. Ise naolo pasurathon dirina? Ketik reg spasi batarasiang spasi goar. Pahatop be ma, bulan na ro pamilihan, unang tarlambat da! Ise natarpillit pintor diboan do maredang-edang tu porlak eden!
Di luat na asing na jonok tu Batarasiang adongma sada baoa na pogos, apala pogos situtu. Mulai tubu ibana ndang hea do pe ditatap na tama, holan na paet do torus. Porsuk situtu do parsorion na. Roa muse. Pardompakanna songon haluan ni kapal tempur. Holsona songon soarani api marjembur-jembur pasiltak-siltak langit. Andung-andungna songon alogo tonga borngin mallongos mangombus bulung bulung. Alai memang namalas do bao i. Holan namangan do tahina, apalagi molo adong saksang, saksang naung bari-bari manang saksang daur ulang pe taho asalma saksang. “Amang, dangolna i sitaononhon. Lebih enak makan sate daripada makan kue bolu. Tumagon do ahu mate daripada mangolu. Sapotni nipinghon” Ima andung-andungna arian nang bodari.
Di na sahali hundul-hundul ma baoa i di bonani unte pangir, huhut marende “Bulan i bulan i, pardomuanni simalolong da inang. Boha bahenon bagian i ingkon taonon”. Di namarende i ibana taringot ma ibana tu turi-turianni donganna sapartinaonan na mandok adong sada raja naburju jala olo mangurupi manang ise pe taho. Las rohana mambege barita i. “Ingkon laho do ahu manopot jala manomba raja i jala mangido tano, jala ingkon tangis tarilu-ilu mangandung bolon do ahu di si asa dilehon tano di ahu, molo boi tano na bolak situtu, lengkap dohot hoda dohot suan-suanan, misalna pohon beringin yang rindang”. Ninna rohana sambil maniulhon lagu siterang bulan.
Laho ma ibana. Neang-neang langkana ala lasni rohana.
“Horas rajanami. Horas tondi madingin pir tondi matogu dihamu raja nami. Tolong hamu jo ahu jolma nahansip, jolma abal-abal jolma odong-odong na tordang di talaga. Napogos situtu do ahu amang raja nami. Ndang marhepeng, ndang martano, ndang marjabu. Apala napahansithon sidangolonhu, sampe saonari ndang adong dope pardijabunghu nanggo apala sahalak pe nian as alas roha, eh…maksudhu raja nami asa las roha dohot daging. Alani hapogoson ma ra on raja nami asa ndang adong borua na olo tu ahu. Huhut ni i raja nami molo tung adongpe naolo aha bahenhu panganon na? Naboido duhut-duhut i lehonon bonduton na? Hansit situtu do ahu rajanami. Ngalian torus. Sombanghu raja nami, asi roham, oloima pangidoanhu”. Ninna ibana huhut diapusi iluna.
“Bege asa hudok. Molo so hudok ndang di botoho, ai so pargorsi ho. Maringkat ma ho. Lioti ma tano on. Nasa tolap ni gogom mangalioti tano on, nasa ima lehononhu tu ho. Dung dilitoti ho nasa gogom mulak ma ho tuson paboahon sadia tolapmu, da, asa pintor hutengken suratni tanomi”. Ninna raja i sambil berlalu mengkel suping.
Maringkat ma ibana sagogo-gogona. Asa tamba bolak tano dapotna, tamba gogoma ibana maringkat. Ndang parduli ibana molo adongpe andor hadungka sangkot tu patna. So ditilli ibana sugani ramba-ramba i. Ri, tolong, sanggar, beang-beang, sijungkot, simarderuma, sanduduk, salagundi dohot bonani sotul pe dos do dibahen ibana didolos ganup. “Asa mamora situtu ahu, asa mamora jong ahu. Dung mamora ahu tuhoronhu ma kapal laut pesiar. Minum-minum koka kola dohot minum panta ma ahu di si hohot dongan marlasni roha huhut mangkail dohot marleng.” Songon ima lasni rohana huhut marlojong hatop songon haba-haba marimpot-impot songon lali habang.
“Raja nami, nunga dao hulojongi. Nunga dao rajanami, mansai bolak hulioti rajanami….rajanami…..rajanami…”
Nanget jala sesep, melankonlis. Hosana manjolhoi songon namarhosa di bagas buntak, sada-sada gotap-gotap. Unjom, tos. Mate!
Sian na dao tarbegema angka pidong marende tarsongon namangandung:
“Ingkon do malangke daging dohot sibuk i”.
Di hau silang nasantipul i tarsurat:
“Amani Holit Mangging, tubu tingki haleon, mangolu di ari udan, monding di ari logo
Tidak ada komentar:
Posting Komentar